Василий  Петров  -  чăваш  литературишĕн  паллă  прозаик, публицист, очеркист. Вăл  -  пирĕн ентеш,  Ҫĕрпӳ районĕнчи   Энĕшкасси   ялĕнче  çуралнă.  Чӳк  уйăхĕн  25-мĕшĕнче  ҫыравҫă  85  ҫул  тултарчĕ.  Ҫавна май  Чиричкасси шкулĕнче  «Василий  Петров  -  пирĕн ентеш»  ятпа  класс сехечĕсем иртрĕҫ. 

      Ял  библиотекин  заведующийĕ  Григорьева  Г.Н. кĕҫĕн класра  вĕренекенсене   ҫыравҫăн  пурнăҫĕпе,  ĕҫĕ-хĕлĕпе, кĕнекисемпе   паллаштарчĕ. 

     7-мĕш  класра  вĕренекенсем  вара  Василий  Петрович  пултарулăхĕн ҫул-йĕрне  тишкерчĕҫ: Шупашкарти   техника  училищинче  вĕреннĕ чухнех   пулас  ҫыравҫă ҫамрăксем  ҫинчен  калав  ҫырас  конкурсра  малти  вырăн  йышăнса  преми  илме  тивĕҫ  пулнă иккен. Уралти  патшалăх  университечĕн  журналистика факультетне пĕтернĕ  хыҫҫăн  чылай  хушă республикăри  хаçат-журнал редакцийĕсенче вăй  хурса ăсталăхне  туптать.  Унăн хайлавĕсене халăх юратса  вулать. Вĕсене  пушкăрт,  тутар,  мари,  вырăс  чĕлхисене  куҫарса  пичетленĕ. Ҫыравҫă  пултарулăхĕнчи  тĕп  тема  -  моральпе этика теми  тесе палăртрĕҫ  вĕренекенсем.

    Пирĕн  хисеплĕ  ентеше  Василий    Петровича  эпир  сумлă  юбилейпа  саламлатпăр.